Bakıda keçirilən D-8 Media Forumunda Birgə Bəyannamə qəbul edilib.
Manset.az xəbər verir ki, Bəyanatda deyilir:
"Biz – Azərbaycan Respublikasının, Banqladeş Xalq Respublikasının, Misir Ərəb Respublikasının, İndoneziya Respublikasının, İran İslam Respublikasının, Malayziyanın, Nigeriya Federativ Respublikasının, Pakistan İslam Respublikasının və Türkiyə Respublikasının hökumət və media nümayəndələri, İqtisadi Əməkdaşlıq üzrə İnkişafda Olan-8 Təşkilatının (D-8) üzvləri – 21 noyabr 2025-ci il tarixində Azərbaycan Respublikasının paytaxtı Bakı şəhərində “Dialoqun, Əməkdaşlığın və Regional Birliyin Gücləndirilməsi” mövzusu altında keçirilən Birinci D-8 Media Forumu üçün toplaşdıq.
Biz Azərbaycan Respublikasının Prezidenti Zati-aliləri cənab İlham Əliyevə D-8-in gücləndirilməsinə və onu daha dinamik və nüfuzlu iqtisadi blok kimi inkişaf etdirməyə yönəlmiş liderliyinə və dəyərli töhfələrinə görə dərin minnətdarlığımızı bildiririk.
Biz həmçinin bütün D-8 üzv dövlətlərini, xüsusilə onların informasiya nazirliklərini, milli media qurumlarını və media agentliklərini Foruma verdikləri fəal və dəyərli töhfələrə görə yüksək qiymətləndiririk.
D-8 üzv dövlətləri arasında qarşılıqlı anlaşmanı, regional həmrəyliyi və ortaq inkişaf məqsədlərini təşviq etmək üçün media əməkdaşlığının gücləndirilməsinə dair öhdəliyimizi bir daha təsdiq edirik.
D-8 Media Forumunun hər il keçirilməsi üçün institusionallaşdırılması və inklüzivliklə yanaşı birgə sahibliyi təmin etmək məqsədilə növbəlilik əsasında təşkil olunması təklifini alqışlayırıq.
Bütün üzv dövlətlərin fəal iştirakı ilə təlim, tədqiqat, innovasiya, rəqəmsal potensialın artırılması və əlaqələndirilmiş kommunikasiya təşəbbüsləri üzrə mərkəzi qovşaq kimi fəaliyyət göstərəcək və Azərbaycan tərəfindən ev sahibliyi ediləcək D-8 Media Excellence Mərkəzinin ən qısa zamanda fəaliyyətə başlamasına çağırırıq.
D-8 Media Excellence Mərkəzi vasitəsilə institusional və insan resursları imkanlarını gücləndirmək məqsədilə strukturlaşdırılmış potensialın artırılması proqramları, seminarlar və peşəkar mübadilə təşəbbüslərinin hazırlanmasını təşviq edirik.
Milli media orqanları, xəbər agentlikləri və ictimai yayımçı qurumlar arasında əməkdaşlığın gücləndirilməsi, informasiya mübadiləsinin yaxşılaşdırılması, strategiyaların uyğunlaşdırılması və birgə məzmun təşəbbüslərinin dəstəklənməsini təşviq edirik.
D-8 ölkələrinin yayım assosiasiyasının yaradılması təşəbbüsünü nəzərə alaraq, proqram mübadiləsi, birgə istehsal və mədəni-məktəbi məzmunun paylaşılmasını asanlaşdırmağı dəstəkləyirik.
D-8-in qlobal səviyyədə görünürlüğünü artırmaq üçün birgə istehsal, transsərhəd hekayəçilik və əməkdaşlıq imkanları yaradan D-8 rəqəmsal platformalarının inkişafını təşviq edirik.
Yalan məlumatlar, dezinformasiya və nifrət nitqi ilə mübarizə məqsədilə ortaq fakt–yoxlama mexanizmləri, ümumi verifikasiya alətləri və operativ kommunikasiya kanalları vasitəsilə əlaqələndirilmiş səylərin gücləndirilməsini təşviq edirik.
Beynəlxalq media təşkilatları, tədqiqat qurumları və qlobal kommunikasiya şəbəkələri ilə tərəfdaşlıqların gücləndirilməsini, zərərli rəqəmsal məzmun və ortaya çıxan risklərə qarşı kollektiv dayanıqlığın artırılması məqsədilə dəstəkləyirik.
Etik jurnalistikanın qorunmasını və bütün media formatlarında peşəkarlıq, məsuliyyət və dəqiqliyi əks etdirən vahid D-8 davranış kodeksinin hazırlanmasını dəstəkləyirik.
Xüsusilə gənclər və müəllimlər üçün media savadlılığı təşəbbüslərinin irəli aparılmasını, bununla da məlumatlı rəqəmsal vətəndaşlığın və üzv dövlətlər üzrə daha təhlükəsiz onlayn mühitlərin təşviq edilməsini dəstəkləyirik.
Məzmunun yaradılması, yoxlanılması və idarə olunmasında süni intellektdən şəffaf və etik istifadə də daxil olmaqla, media texnologiyalarında məsuliyyətli innovasiyaların dəstəklənməsini təşviq edirik.
Jurnalistika institutları və məktəbləri arasında əməkdaşlığın gücləndirilməsini, jurnalistlər üçün təqaüd proqramlarının, akademik mübadilələrin və peşəkar inkişaf imkanlarının təşviq edilməsini dəstəkləyirik.
Azərbaycanın ev sahibliyi edəcəyi D-8 Media Excellence Mərkəzinin rəhbərliyi ilə sıx əməkdaşlığa hazır olduğumuzu ifadə edir və onun səmərəli fəaliyyətini dəstəkləmək, ortaq prioritetləri irəlilətmək və bütün D-8 üzv dövlətləri arasında daha güclü media əməkdaşlığını təşviq etmək öhdəliyimizi bir daha təsdiq edirik.
Bu Bəyanatın effektiv şəkildə həyata keçirilməsinin daha əlaqəli, məlumatlı və dayanıqlı bir D-8 media məkanının formalaşmasına, ölkələrimiz arasında sülhə, inkişafa və qarşılıqlı anlaşmaya dəstək verəcəyinə əminik.
Birinci D-8 Media Forumunun uğurla keçirilməsi üçün mükəmməl təşkilati hazırlıqları təmin etdiyinə görə Azərbaycan Respublikası Medianın İnkişafı Agentliyinə minnətdarlığımızı bildiririk.
21 noyabr 2025-ci il tarixində, Azərbaycan Respublikasının paytaxtı Bakı şəhərində qəbul edilmişdir".
