Aqil Ələsgərə sözardı...
Belə bir atalar misalı var: "Görünən dağa nə bələdçi?". İctimaiyyət arasında özünə reputasiya qazanmaq üçün heç bir xarici dil bilmədiyi halda ( nə yaza bilir, nə də oxuya bilir) belə mühüm bir tədbirə qatılaraq ölkənin nüfuzuna ciddi zərbə vurmaq zərurəti Aqil Ələsgərdə haradan yaranır?.. Belə biabırçı vəziyyətə "eşitməmək" kimi don geyindirmək də ayrıca bir "fərasətdir". Moderatorla onun arasında bir neçə addım olmasına baxmayaraq və moderatorun mikrafonla çıxış etdiyi halda, öz əməlləri ilə öz közündə yanan Aqil Ələsgər istəyir ki, millətin gözünə kül üfürsün. Görəsən, ilahiyyat fakültəsini bitirən şəxs elə mollalıqla məşğul olsa, daha yaxşı olmazdımı? Görəsən, dil bilmədiyi halda başqalarının köməkliyi ilə özünü bu tədbirə soxuşdurmağın nə mənası var? Cümlələri belə yekunlaşdırmaq olar: "Axı "molla"nın ATƏT-in konfransı kimi mühüm bir yerdə nə işi var? Qaxıl, otur yerində də...
***
“Qızılbaş” Gəncləri Maarifləndirmə İctimai Birliyinin təmsilçisi, “Yeni Çağ” saytının baş redaktoru Aqil Ələsgərin ATƏT-də rus dilindəki çıxışı sosial şəbəkələrdə ciddi müzakirələrə səbəb olub.
Manset.az Milli.az-a istinadən xəbər verir ki, A.Ələsgərin 2026-cı il martın 16-sı Vyanada ATƏT-in Demokratik Təsisatlar və İnsan Hüquqları Bürosunun İnsan Ölçüsü Konfransında Azərbaycanın vətəndaş cəmiyyəti təmsilçisi statusunda bilmədiyi xarici dildə çıxış etməsi tənqidlərlə qarşılanıb. Bu isə özlüyündə Aqil Ələsgərin Vyanaya - ATƏT tədbirinə hansı xətlə getməsi sualını yaradıb.
Məsələ ilə bağlı Qeyri-Hökumət Təşkilatlarına Dövlət Dəstəyi Agentliyinin ictimaiyyətlə əlaqələr üzrə meneceri Ülviyyə Qarayeva bildirib ki, Aqil Ələsgərin Vyana səfəri QHT Agentliyinin xətti ilə maliyyələşdirilməyib: “Ümumiyyətlə, 2026-cı il üzrə açıqlanmış qrant müsabiqələrinin qalibləri arasında da “Qızılbaş” Gəncləri Maarifləndirmə İctimai Birliyinin adı yoxdur. Aqil Ələsgərə də bu tədbirdə iştirakı üçün heç bir səfər qrantı verilməyib”.
Agentlik rəsmisi xarici ölkələrdə, beynəlxalq təşkilatlarda ölkəni təmsil edən QHT təmsilçilərini də məsuliyyətli olmağa dəvət edib: “Təəssüflər olsun ki, bir sıra QHT nümayəndələrinin tədbirlərə hazırlıqsızlığı ölkə imicinə ziyan vurur. QHT Agentliyi xaricdə keçirilən mühüm tədbirlərdə iştirakı üçün zəruri səfər xərclərini qarşıladığı QHT təmsilçilərinin yüksək intellekt, hazırlıq səviyyəsinə, xarici dildə sərbəst çıxış etmək imkanına malik olmasına xüsusi yanaşır”.
Mövzu ilə bağlı Aqil Ələsgər özü isə deyib ki, o illərdir, öz şəxsi təşəbbüsü ilə beynəlxalq tədbirlərə qatılır və haqq bildiyi mövqeni müdafiə edir: “Bu dəfə də yenə öz şəxsi təşəbbüsümlə ATƏT-in toplantısına qatılmışam. İllərdir ki, ATƏT-in toplantılarına qatılıram, çıxış edirəm. Sadəcə olaraq, dünən moderator xanımın da dediyi kimi salon böyük, onunla aramızda məsafə olduqca uzun və içəridə mikrofonun səsi çox zəif olduğundan xanım moderatoru eşidə bilməmə kimi kiçik texniki qəza yaşadıq. Sinxron tərcümə avadanlığı, içəridə olan texniki nasazlıq bir birimizi eşitməyə problem yaşatdı. Bir daha təkrar edirəm, diqqətlə kadra baxın. Xanım moderator da, sonda açıqca bildirir ki, “o, bizi eşitmir”.
Bunu eşitdikləri, gördükləri, hətta yazdıqları halda hücuma davam edənlərin məram və məqsədləri heç də qüsursuzluq arayışı deyil”.
