Türkiyə Prezidenti Rəcəb Tayyib Ərdoğan bu gün rəsmi görüşlər üçün Qazaxıstana səfər edəcək.
Manset.az Türkiyə mediasına istinadən xəbər verir ki, Ərdoğan sıx diplomatik proqram çərçivəsində paytaxt Astana şəhərində ikitərəfli görüşlərdən sonra Türk Dövlətləri Təşkilatının (TDT) Qeyri-Rəsmi Liderlər Zirvəsi üçün Türkistan şəhərinə səfər edəcək.
Ərdoğan Müstəqillik Sarayında Qazaxıstan Prezidenti Kasım Comərt Tokayev ilə təkbətək görüşəcək, daha sonra isə həmkarı ilə birlikdə Türkiyə-Qazaxıstan Yüksək Səviyyəli Strateji Əməkdaşlıq Şurasının iclasına rəhbərlik edəcək.
Görüşlərdə “gücləndirilmiş strateji tərəfdaşlıq” səviyyəsindəki ikitərəfli münasibətlər bütün aspektləri ilə müzakirə olunacaq və iki ölkə arasındakı strateji bağların möhkəmləndirilməsi üçün atılacaq addımlar nəzərdən keçiriləcək.
