Bir günün tam olaraq 24 saat davam etdiyi qəbul olunur və gündəlik həyat, iş qrafikləri, vaxt ölçüsü məhz buna əsaslanır. Lakin alimlər son illərdə müəyyən ediblər ki, Yer kürəsi həmişə eyni sürətlə fırlanmır. Bu isə planetin tədricən daha yavaş hərəkət etməsinə səbəb olur.
Manset.az-ın xarici mediaya istinadən məlumatına görə, məhz buna görə bir çox tədqiqatçı hesab edir ki, çox uzaq gələcəkdə sutkanın uzunluğu 25 saata çata bilər. İlk baxışda bu fikir elmi-fantastik filmləri xatırlatsa da, onun arxasında elmi izah dayanır.
“Science Advances” jurnalında yayımlanan araşdırmaya görə, bu dəyişimin əsas səbəbkarı Aydır. Ayın cazibə qüvvəsi okeanlarda qabarma və çəkilmə hadisələri yaradır. Suyun davamlı hərəkəti isə Yer kürəsinin fırlanmasına zəif sürtünmə təsiri göstərərək onu tədricən ləngidir. Bu təsir olduqca kiçik olsa da, fasiləsiz şəkildə davam edir. Nəticədə zaman keçdikcə Yer daha yavaş fırlanmağa başlayır.
Alimlərin sözlərinə görə, bu dəyişiklik o qədər cüzidir ki, onu gündəlik həyatda hiss etmək mümkün deyil. Bu fərqi yalnız son dərəcə dəqiq atom saatları və astronomik müşahidələr vasitəsilə müəyyənləşdirmək olur. Aparılan ölçmələr göstərir ki, günlərin real uzunluğu çox cüzi şəkildə dəyişir və uzunmüddətli perspektivdə artım meyli nümayiş etdirir.
