Salonikidən Memmingenə uçan "Ryanair" şirkətinə məxsus sərnişin təyyarəsində mühərrikin pərinin qopması nəticəsində böyük təhlükə yaşanıb.
Manset.az xarici mediaya istinadən xəbər verir ki, ABŞ Milli Nəqliyyat Təhlükəsizliyi Şurasının (NTSB) hazırladığı ilkin hesabatda iyulun 10-da baş verən hadisə zamanı sağ mühərrikdən qopan hissələrin təyyarənin salon pəncərələrindən birini sındırdığı bildirilib.
Şüşənin sınması nəticəsində yaranan təzyiq itkisi səbəbindən Lyubişa Karoviç adlı sərnişinin başı və sağ çiyni pəncərədən çölə çəkilib.
Karoviçin ağır xəsarət aldığı və şoka düşdüyü bildirilib. Serbiya vətəndaşı olan sərnişinin həyat yoldaşı Svetlana Qrkoviç Maksimoviç iki sərnişinin köməyi ilə ərini ayaqlarından tutaraq dəqiqələrlə təyyarənin daxilində saxlaya bildiklərini söyləyib.
Təyyarənin heyəti uçuş zamanı mühərrikdə güclü titrəyiş barədə xəbərdarlıq aldıqlarını və mühərrikin gücünü azaldaraq lazımi yoxlamalar apardıqlarını bildirib. Titrəyişin dayanmasından sonra təyyarə avtomatik idarəetmə sistemi ilə uçuşunu davam etdirib. Lakin qısa müddət sonra güclü partlayış səsi eşidilib. Bundan sonra heyət fövqəladə vəziyyət elan edərək geri qayıtmaq qərarına gəlib.
Kabin əməkdaşları oksigen maskaları açılmamışdan əvvəl salonda tüstü qoxusu hiss etdiklərini bildiriblər. Ardınca sərnişinlərdən birinin sınmış pəncərəyə sıxıldığını görərək kömək çağırıblar.
