Çinin GAC şirkətinin mühəndisləri faydalı iş əmsalı (FİƏ) 99,03 faiz olan yeni elektromotor hazırlayıblar. “Quark 2.0” adlandırılan mühərrikdə amorf polad və karbon lifindən istifadə edilib.
Manset.az Modern.az-a istinadən xəbər verir ki, yeni mühərrikin əsas xüsusiyyətlərindən biri amorf poladdan hazırlanmış statordur. Bu material maqnit enerji itkilərini 60-80 faiz azaltmağa imkan verir.
Mühəndislər həmçinin 30 min dövr/dəqiqə sürətə davam gətirə bilən, karbon lifindən hazırlanmış rotordan istifadə ediblər. Onun cəmi 1 millimetr qalınlığında xüsusi korpusu var.
Bununla belə, amorf poladın yaratdığı vibrasiya və səs-küy mühəndislər üçün əlavə çətinlik yaradıb. Problemin aradan qaldırılması üçün elektromaqnit və konstruktiv optimallaşdırma aparılıb.
Yeni elektromotorun FİƏ göstəricisi 2025-ci ildə ABB tərəfindən hazırlanmış sənaye mühərrikinin 99,13 faizlik rekord göstəricisinə yaxınlaşıb.
Quark 2.0 mühərrikinin Aion və Hyptec markalı avtomobillərdə, o cümlədən yeni Aion i60 modelində istifadə edilməsi nəzərdə tutulur. İstehsal artıq başlayıb. Qiymətin münasib saxlanılması üçün mühəndislər ildə 300-400 min mühərrik istehsalına ehtiyac olduğunu bildirirlər.
