Rusiya Təhlükəsizlik Şurasının vitse-prezidenti Dmitri Medvedev sosial media hesabında 2023-cü il üçün 10 proqnozunu paylaşıb.
Manset.az-ın xarici mediaya istinadən məlumatına görə, Medvedevin yeni illə bağlı proqnozları arasında "ABŞ-da vətəndaş müharibəsi olacaq. Vətəndaş müharibəsindən sonra respublikaçılara qoşulacaq İlon Mask bəzi ştatlarda prezident seçkilərində qalib gələcək" kimi hadisələr olub.
Sosial media hesabında 2023-cü ilə dair proqnozlarını paylaşan Medvedev, ABŞ-da vətəndaş müharibəsinin başlayacağı iddiası da daxil olmaqla, 10 maddə sadalayıb. Medvedevin proqnozlarını təqdim edirik:
- Neftin qiyməti 150 dollar/barelə qalxacaq, təbii qazın qiyməti 1000 kubmetr üçün 5 min dollara çatacaq.
- Britaniya yenidən Aİ-yə daxil olacaq
- Böyük Britaniyanın qayıtması ilə Aİ məhv ediləcək, avro dövriyyədən çıxarılacaq
- Polşa və Macarıstan Ukraynanın dağıdılan qərb hissələrini ilhaq edəcək
- Almaniyanı və onun Polşa, Baltikyanı ölkələr, Çexiya, Slovakiya və Kiyev Respublikası kimi peyklərinin ərazilərini əhatə edən Dördüncü Reyx yaradılacaq.
- Fransa ilə Dördüncü Reyx arasında müharibə olacaq. Bu prosesdə Polşa bölünəcək
- Şimali İrlandiya Böyük Britaniyadan ayrılaraq İrlandiya Respublikasına qoşulacaq
- ABŞ-da vətəndaş müharibəsi başlayacaq, Kaliforniya və Texas müstəqilliklərini elan edəcəklər. Texas və Meksika ittifaq yaradacaq. Vətəndaş müharibəsindən sonra respublikaçılara qoşulacaq İlon Mask bəzi ştatlarda prezident seçkilərində qalib gələcək.
- Qiymətli kağızlar bazarı və maliyyə fəaliyyətləri Asiyaya köçmək üçün ABŞ və Avropanı tərk edəcək
- Bretton Woods monetar idarəetmə sistemi çökəcək və bu, BVF və Dünya Bankının məhvinə gətirib çıxaracaq. Avro və dollar qlobal ehtiyat valyuta olmaqdan çıxacaq. Bunun əvəzinə rəqəmsal valyutalardan səmərəli istifadə olunacaq.
