Bərdə rayonunun Yeni Daşkənd kəndində baş verən hadisə ilə əlaqədar olaraq Bərdə Rayon Mərkəzi Xəstəxanasına 27 nəfər yerləşdirilib.
Manset.az xəbər verir ki, 1 nəfərdə xəstəxanayaqədər ölüm halı qeydə alınıb. Müxtəlif növ bədən xəsarətləri və digər şikayətlərlə tibb müəssisəsinin müvafiq şöbələrinə yerləşdirilən şəxslərə zəruri tibbi xidmətlər göstərilib.
Vəziyyəti qənaətbəxş hesab olunan 2 nəfər ambulator müalicə üçün evə buraxılıb. Digər şəxslərin müalicələri davam etdirilir. 1 nəfərin vəziyyəti ağır, 2 nəfərin vəziyyəti orta ağır, 21 nəfərin vəziyyəti isə stabil qiymətləndirilir.
Əlavə məlumat veriləcək.
***
Bərdə RİH başçısının Yeni Daşkənd kənd inzibati ərazi dairəsi üzrə nümayəndəsi Sabir Cahangirovun saytımıza bildirdiyinə görə, hadisənin baş verdiyi ev yeni inşa olunub.
Döşəmənin çökməsi yasda eyni otaqda olan 50-yə yaxın insanın ağırlığına dözməməsidir: “Ev yeni inşa olunub. Sadəcə otaqda 50-yə yaxın şəxs olduğuna görə döşəmə ağırlığa dözməyib. Hadisə nəticəsində kənd sakini, 65 yaşlı Sarıtel Məmmədova vəfat edib”.
***
Bu gün Bərdə rayonunda bir nəfərin ölümü, xeyli insanın xəsarət alması ilə nəticələnən hadisə baş verib.
Manset.az TƏBİB-ə istinadən xəbər verir ki, rayonun Yeni Daşkənd kəndində baş verən insidentlə əlaqədar olaraq Bərdə Rayon Mərkəzi Xəstəxanasına 23 nəfər yerləşdirilib.
1 nəfərdə xəstəxanayaqədər ölüm halı qeydə alınıb. Digər şəxslərin ümumi müayinələri davam etdirilir.
Əlavə məlumat veriləcək.
Qeyd edək ki, hadisə yas mərasimi keçirilən evin döşəməsinin çökməsi nəticəsində baş verib.
