İyun ayının əvvəlindən etibarən Naxçıvan Muxtar Respublikasında taxıl biçininə start veriləcək. Biçin prosesinin mütəşəkkil həyata keçirilməsini təmin etmək məqsədilə Naxçıvan Muxtar Respublikası Kənd Təsərrüfatı Nazirliyində Mərkəzi Qərargah yaradılıb.
Manset.az xəbər verir ki, mayın 29-da Kənd Təsərrüfatı Nazirliyində Mərkəzi Qərargahın ilk iclası keçirilib.
Naxçıvan Muxtar Respublikası kənd təsərrüfatı naziri Rafail Quliyevin sədrliyi ilə keçirilən iclasda Naxçıvan Muxtar Respublikası Kənd Təsərrüfatı Nazirliyinin, eləcə də Nazirliyin tabeli qurumlarının, habelə Fövqəladə Hallar Nazirliyi və Dövlət Statistika Komitəsinin məsul şəxsləri iştirak ediblər.
İclası giriş sözü ilə açan kənd təsərrüfatı naziri Rafail Quliyev Mərkəzi Qərargahın yaradılması və faəliyyət istiqamətləri barədə məlumat verərək qeyd edib ki, qərargah cari ildə muxtar respublikada taxıl biçininin vaxtında həyata keçirilməsi, itkisiz yığılaraq anbarlara daşınması, həmçinin biçindən sonra tələb olunan aqrotexniki tədbirlərin görülməsini təmin etmək məqsədilə yaradılıb.
İclasda, Mərkəzi Qərargahın rəhbəri, Nazirliyin Bitkiçiliyin təşkili və monitorinqi şöbəsinin müdiri Məhəmməd Zeynalov 2025-ci ilin məhsulu üçün taxıl əkininə dair statistik faktları, o cümlədən biçin prosesinə hazırlıqla bağlı görülən işləri diqqətə çatdırıb. Bildirib ki, 2025-ci ilin məhsulu üçün Naxçıvan Muxtar Respublikası üzrə ümumilikdə 17581 hektar sahədə taxıl əkinləri həyata keçirilib ki, bunun da 16946,5 hektarını payızlıq, 634,5 hektarını isə yazlıq əkinlər təşkil edir. Aparılan əkinlərin 8275,6 hektarı buğda, 9305,7 hektarı isə arpa əkinləridir.
“Taxıl biçininə muxtar respublika üzrə 77 ədəd saz vəziyyətdə taxılbiçən kombaynlar cəlb ediləcək”- deyən Məhəmməd Zeynalov kombaynların 64 ədədinin fiziki şəxslərdə, 4 ədədinin Nazirliyin “Naxçıvan Toxumçuluq” Məhdud Məsuliyyəti Cəmiyyətinin balansında, 9 ədədinin isə “Naxçıvan Aqroservis” Açıq Səhmdar Cəmiyyətinin balansında olduğunu qeyd edib. Həmçinin “Naxçıvan Aqroservis” ASC tərəfindən biçin qiymətinin ötən il olduğu kimi bu il də bir hektar üçün 50 manat məbləğində müəyyən edildiyi nəzərə çatdırılıb.
İclasda
“Naxçıvan Aqroservis” ASC-nin İdarə Heyətinin sədr müavini Həzi Həsənovun,
Naxçıvan Muxtar Respublikası Fövqəladə Hallar Nazirliyinin Fövqəladə Halların Xəbərdar
Edilməsi və Nəticələrinin Aradan Qaldırılması İdarəsinin Fövqəladə halların xəbərdar
edilməsi şöbəsinin rəisi Mirtaleh Seyidovun, Naxçıvan Muxtar Respublikası Dövlət
Statistika Komitəsinin İstehsal və xidmət statistikası şöbəsinin müdir müavini
Məhərrəm Məmmədovun çıxışları dinlənilib, zəruri məsələlər qeyd edilib. Biçin və
ondan sonrakı dövrdə taxıl sahələrində yanğın təhlükəsizliyi qaydalarına riayət
edilməsinin önəminə diqqət çəkilərək İnzibati Xətalar Məcəlləsinin müvafiq maddəsinə
əsasən əkin yerinin yandırılmasına görə -
fiziki şəxslərin dörd yüz manatdan altı yüz manatadək məbləğdə, vəzifəli şəxslərin min beş yüz manatdan iki min manatadək məbləğdə, hüquqi şəxslərin isə beş min manatdan altı min manatadək məbləğdə cərimə edilməsinin nəzərdə tutulduğu bildirilib.
Sonra taxıl biçininə hazırlıqla bağlı mövcud vəziyyət və qarşıda duran vəzifələr müzakirə olunub.
Nazir Rafail Quliyev biçin gedişatının gündəlik olaraq nəzarətdə saxlanılması və qarşıya çıxan problemlərin operativ şəkildə həlli istiqamətində tapşırıq və tövsiyələrini verib, qarşıdakı dövr üçün əlavə tədbirlər müəyyənləşdirilib.
