"Ağdamın azad edilməsi Müzəffər Ordumuzun qazandığı şanlı qələbənin nəticəsidir"

20 noyabr – Ağdam Şəhəri Günü Azərbaycan xalqının gücünün, əzminin, birliyinin və müzəffər ordumuzun qazandığı qələbənin təntənəsidir. Ağdam bu gün təkcə dirçəlişin deyil, həm də gələcəyə inamın, milli iradənin və dövlətçilik qüdrətinin simvoluna çevrilib.

Bunu Manset.az-a açıqlamasında Milli Məclisin deputatı Vasif Qafarov deyib. O qeyd edib ki, 1993-cü il 23 iyulda Ağdam uzun sürən döyüşlərdən sonra Ermənistan silahlı qüvvələri tərəfindən işğal olundu:

"Rayonun 73 %-i, o cümlədən 90 kəndi düşmənin nəzarətinə keçdi. İşğal nəticəsində 128 min insan məcburi köçkünə çevrildi, 6 mindən çox insan şəhid oldu, yüzlərlə sosial və mədəni obyekt, məktəblər, sənaye müəssisələri dağıdıldı, yaşayış məntəqələri tamamilə yandırıldı və talan edildi. 1993-cü il 29 iyulda BMT Təhlükəsizlik Şurası 853 saylı qətnamə qəbul edərək “işğalçı qüvvələrin Ağdam rayonu və digər işğal edilmiş Azərbaycan ərazilərindən dərhal, tam və qeyd-şərtsiz çıxarılmasını” tələb etdi. ATƏT-in Minsk qrupuna daxil olan ölkələr də hücumu qəti şəkildə pislədilər. Lakin Ermənistan beynəlxalq hüququn tələblərinə əməl etmədi və bölgədə qanunsuz məskunlaşma, talan, etnik təmizləmə siyasətini davam etdirdi.

Vətən müharibəsində əldə etdiyimiz tarixi qələbə nəticəsində imzalanmış üçtərəfli bəyanata əsasən, 2020-ci il noyabrın 20-də Ağdam rayonunun işğal altında olan əraziləri Azərbaycana təhvil verildi. Bu addım həm Azərbaycanın suverenliyinin bərpasında mühüm mərhələ oldu, həm də genişmiqyaslı döyüşlərin davam etməsi nəticəsində yarana biləcək əlavə insan tələfatının qarşısını aldı. Ağdamın bir güllə belə atılmadan azad olunması, Azərbaycan Ordusunun gücünün, siyasi-diplomatik iradəmizin bariz nümunəsi kimi tarixə düşdü. Bu təhvil prosesi bölgədə sülhün və təhlükəsizliyin təmin edilməsi baxımından da mühüm rol oynadı.

Azərbaycan Respublikası Nazirlər Kabinetinin 16 avqust 2022-ci il tarixli Qərarı ilə “Ağdam şəhərinin 2040-cı ilədək inkişafına dair Baş Plan” təsdiq edilib. İşğaldan azad olunmuş ərazilər arasında ilk təsdiq edilən Baş Plan məhz Ağdam şəhərinə məxsusdur. Baş Planın əsas məqsədi Ağdamı azad edilmiş ərazilərin ən böyük, ölkənin isə dördüncü böyük şəhərinə çevirməkdir. Bu çərçivədə şəhərdə 100 min nəfərə qədər əhalinin yaşayacağı planlaşdırılır".

Deputat qeyd edib ki, Şanlı Qələbədən sonra Ağdamda genişmiqyaslı tikinti-quruculuq işləri aparılır:

"Xarabalıqlar üzərində müasir, dayanıqlı və yaşıl şəhər modeli qurulur. “Böyük Qayıdış” proqramı çərçivəsində şəhər və kəndlər sürətlə bərpa olunur, yeni yollar çəkilir, mühəndis-kommunikasiya infrastrukturu yaradılır, istehsal müəssisələri açılır, yaşıllıqlar salınır, ərazilər mina və partlamamış sursatlardan təmizlənir. Baş Plan çərçivəsində Ağdam şəhəri 5 məhəllə üzrə layihələndirilib. Hazırda 2-ci məhəllədə 66 yaşayış binasının tikintisi aparılır və paralel olaraq digər məhəllələrdə də işlər davam etdiriləcək. Eyni zamanda, Ağdam rayonunun Kəngərli, Xıdırlı və Sarıcalı kəndlərində bərpa-quruculuq işlərinin birinci mərhələsi tamamlanıb. Rayonun digər kəndləri üzrə layihələndirmə də davam edir. 2025-ci ilin oktyabr ayına qədər 825 ailə, 3318 nəfər Ağdama qayıdaraq doğma yurdunda məskunlaşıb.

Ağdam rayonunda iqtisadi fəallığın artırılması və yerli istehsalın genişləndirilməsi məqsədilə həyata keçirilən ən mühüm layihələrdən biri Ağdam Sənaye Parkıdır. Prezident İlham Əliyevin 28 may 2021-ci il tarixli Fərmanına əsasən yaradılan sənaye parkı 190 hektarlıq geniş ərazini əhatə edir və işğaldan azad olunan torpaqların bərpası istiqamətində strateji addımlardan biridir. Ağdam Sənaye Parkının yaradılmasının əsas məqsədi Qarabağın sənaye potensialını canlandırmaq, sahibkarlıq fəaliyyətinə dəstək vermək, regionda yeni istehsal sahələri formalaşdırmaq və yerli əhali üçün geniş məşğulluq imkanları yaratmaqdır. Rezidentlərin sayına görə Sumqayıtdan sonra ölkənin ikinci ən böyük sənaye parkı olan Ağdam Sənaye Parkında bu günə qədər ümumi dəyəri 260 milyon manatdan çox olan layihələr üzrə 28 sahibkarlıq subyektinə rezidentlik, 4 sahibkara isə qeyri-rezidentlik statusu verilib. Hazırda parkda 9 müəssisə fəaliyyət göstərir, 5-dən çox müəssisədə isə tikinti və təşkilati işlər davam etdirilir. Sahibkarlar tərəfindən indiyədək layihələrə 115 milyon manatdan çox investisiya yatırılıb, bu isə bölgənin iqtisadi canlanmasına mühüm töhfədir. Parkın fəaliyyəti nəticəsində 938 nəfər daimi işlə təmin edilib və gələcəkdə iş yerlərinin daha da artacağı gözlənilir. Ağdam Sənaye Parkı təkcə iqtisadi layihə deyil, Qarabağın dirçəlişinin, yenidən qurulmasının və güclü sənaye mərkəzinə çevrilməsinin real göstəricisidir. Bu parkın inkişafı regionda dayanıqlı iqtisadiyyatın formalaşmasına, ixrac imkanlarının genişlənməsinə və yeni istehsal sahələrinin yaranmasına şərait yaradır.

Ağdamda və bütövlükdə Qarabağ və Şərqi Zəngəzurda aparılan bərpa-quruculuq işləri tarixi yaddaşın bərpası, müasir şəhər konsepsiyasının formalaşdırılması, yeni iqtisadi mərkəzin yaradılması, məcburi köçkünlərin təhlükəsiz və layiqli qayıdışı kimi strateji məqsədlərə xidmət edir".