Mətbəxdə əsasən şirniyyatlara ətir vermək üçün istifadə olunan mixəyin (qərənfil) gündəlik həyatda düşündüyümüzdən daha çox faydası var. Kəskin qoxusu və güclü təsiri ilə tanınan bu ədviyyat illərdir təbii və praktik həll yolları axtaranların diqqət mərkəzindədir. Mütəxəssislərin bildirdiyinə görə, düzgün istifadə edildikdə bir çimdik mixək bir çox xırda problemi asanlıqla aradan qaldıra bilər.
Manset.az Qaynarinfo-ya istinadən gündəlik həyat üçün faydalı hesab edilən mixəyin ən çox istifadə olunduğu bir neçə nümunəni təqdim edir:
Ağız qoxusuna qarşı təbii vasitə
Yeməkdən sonra ağızda yaranan xoşagəlməz qoxunu aradan qaldırmaq üçün bir ədəd mixəyi çeynəmək kifayət edir. Bu üsul kimyəvi vasitələrə ehtiyac olmadan nəfəsi təravətləndirməyə kömək edir.
Dolab və ayaqqabı qoxularının qarşısını alır
Kiçik bir kisəyə qoyulan mixək kiçik şkaf çəkməcələrində və ayaqqabı dolablarında yaranan ağır qoxuları azaldır, olduğu mühitə xoş ətir yayır.
Həşəratları uzaqlaşdırır
Mixəyin kəskin qoxusu qarışqa və xırda həşəratları narahat edir. Pəncərə kənarlarına və mətbəxdə bəzi nöqtələrə qoyulan mixək yay aylarında həşərat problemini azaltmağa kömək edə bilər.
Çay və qəhvəyə fərqli dad qatır
Bitki çaylarına və türk qəhvəsinə əlavə edilən bir ədəd mixək içkinin aromasını zənginləşdirir və fərqli ləzzət yaradır.
Evdə təbii qoxu yayıcı kimi istifadə olunur
Qaynar suya bir neçə mixək atmaqla qısa müddətdə evin içinə xoş qoxu yaymaq mümkündür. Bu üsul xüsusilə yeməkdən sonra yaranan ağır qoxuların aradan qaldırılmasında faydalıdır.
Diş həssaslığında müvəqqəti rahatlama verir
Ənənəvi üsullara görə, mixəyin həssas nahiyəyə qısa müddət toxundurulması diş əti narahatlığını müvəqqəti azalda bilər. Həkimlər bu üsulun müalicə olmadığını xatırladır.
Saxlama yerlərində qoruyucu rol oynayır
Un və paxlalı məhsullar saxlanılan qabların içinə əlavə olunan mixək xoşagəlməz qoxuların yaranmasının qarşısını ala və dolab içində daha təmiz hava hissi yarada bilər.
Qeyd olunur ki, mixəkdən istifadə edərkən həddən artıq miqdarda tətbiqdən qaçmaq və həssas şəxslərin diqqətli olması tövsiyə edilir.
