Daxili xəstəliklər mütəxəssisi Dr. Elif Başaran gündəlik yorğunluq hissinin çox zaman sadə halsızlıq deyil, müxtəlif sağlamlıq problemlərinin ilkin əlaməti ola biləcəyini vurğulayır.
Manset.az-ın xarici mediaya istinadən məlumatına görə, həkim bildirib ki, ferritin, B12 və D vitamini çatışmazlığı, qalxanabənzər vəzi pozğunluqları, insulin müqaviməti və qan şəkərinin dalğalanması yorğunluğa səbəb ola bilər. O vurğulayıb ki, laborator göstəricilər normal görünsə belə, aşağı sərhəd dəyərlər belə insanın özünü zəif hiss etməsinə gətirib çıxara bilər.
Dr. Başaran qeyd edib ki, “beyin dumanlığı”, diqqət yayınıqlığı, gün boyu enerji düşməsi B12 vitamini və qan şəkəri dəyişiklikləri ilə bağlı ola bilər. Onun sözlərinə görə, müasir həyat tərzi – qeyri-müntəzəm yuxu, oturaq həyat və xroniki stress – bu vəziyyəti daha da ağırlaşdırır.
Mütəxəssis bildirir ki, 2–3 həftədən uzun sürən, gündəlik həyatı çətinləşdirən və digər simptomlarla müşayiət olunan yorğunluq hallarında mütləq həkimə müraciət edilməlidir. O əlavə edib ki, yorğunluq bədənin “nəyinsə düzgün olmadığını” göstərən erkən xəbərdarlıq siqnalıdır.
