Kreslosunu itirib səfir təyin olunan SABİQ MƏMURLAR – ARAŞDIRMA

Dünyanın bir sıra ölkələrində Azərbaycanın diplomatik nümayəndəlikləri fəaliyyət göstərir. Xaricdəki səfirliklərimizə rəhbərlik edən diplomatlarımız içərisində ölkəmizdə yüksək vəzifələrdə çalışmış bir sıra simalarda var.

Onlarda bir qismi yüksək vəzifələrindən azad olunduqdan dərhal sonra səfir təyin olunaraq, diplomat təyinatı alıblar.

Manset.az xəbər verir ki, Bizim.Media yüksək vəzifələrini itirib səfir təyin olunan sabiq məmurları araşdırıb.

Tamerlan Qarayev

1992-1993-cü illərdə Azərbaycan Ali Soveti sədrinin I müavini olan Tamerlan Qarayev bu vəzifəsi ilə sağollaşdıqdan sonra, artıq 28 ildir ki səfir kimi çalışır. Bu illər ərzində o, Çin (1993-2001), Hindistan (2004-2011), İndoneziyadakı (2011-2018) diplomatik korpusumuza rəhbərlik edib. 2018-ci ilin dekabrından bəri isə Litvadakı səfirimiz kimi fəaliyyətini davam etdirir. 

Vilayət Quliyev

Vilayət Quliyev 1999-2004-cü illərdə xarici işlər naziri vəzifəsində çalışıb. 2004-cü ilin aprelində nazir vəzifəsindən azad edilən V. Quliyev həmin ilin iyununda Polşadakı səfirimiz olub və 2010-cu ilə qədər bu ölkədəki diplomatik nümayəndəliyimizə rəhbərlik edib.

Onun səfir kimi növbəti iş yeri isə Macarıstan olub. 2021-ci ilin iyulunadək bu ölkədə çalışan sabiq nazir, bu ilin mayından etibarən Bosniya və Herzoqavinadakı fövqəladə və səlahiyyətli səfirimizdir. 

Həsən Həsənov

Həsən Həsənov 1991-1992-ci illərdə Baş nazir, 1993-1998-ci illərdə isə xarici işlər naziri kimi çalışıb. O, 2004-cü il sentyabr ayının 1-də Azərbaycanın Macarıstandakı, 2010-cu il mart ayının 30-da isə Azərbaycan Polşadakı Fövqəladə və Səlahiyyətli Səfiri təyin edilib. Həsən Həsənov 2021-ci ilin yanvarındək səfirlik fəaliyyətini davam etdirib.

Polad Bülbüloğlu

Xalq artisti Polad Bülbüloğlu 1991-2006-cı illərdə mədəniyyət naziri vəzifəsini icra edib. Həmin il yanvarın 30-da nazir vəzifəsindən azad olunan Polad Bülbüloğlu Azərbaycanın Rusiyadakı səfiri təyin edilib. O, artıq 16 ildən çoxdur ki səfir kimi fəaliyyətini davam etdirir.

Ramiz Həsənov

14 dekabr 2005-ci ildə Azərbaycan Respublikası Standartlaşdırma, Metrologiya və Patent üzrə Dövlət Agentliyinin baş direktoru vəzifəsinə təyin olunub. 2008-2018-ci illərdə Azərbaycan Respublikası Standartlaşdırma, Metrologiya və Patent üzrə Dövlət Komitəsinin sədri olub.

Ramiz Həsənov 15 may 2018-ci ildə Xarici İşlər nazirinin müavini təyin olunub və 2021-ci ilin aprelinədək bu vəzifəni icra edir. Vəzifəsindən azad olunduqdan sonra isə Azərbaycanın İspaniyadakı səfiri təyin edilib.

Namiq Abbasov 

Azərbaycanın sabiq Milli Təhlükəsizlik naziri Namiq Abbasov hu vəzifəni 1994-2005-ci illərdə icra edib. 2004-cü ildə isə Azərbaycanın Özbəkistandakı fövqəladə və səlahiyyətli səfiri təyin edilib. O, 2012-ci ilədək bu ölkədə səfir kimi fəaliyyət göstərib. 

Məhərrəm Əliyev 

1993-2007-ci illərdə Bakı Şəhər Baş Polis idarəsinin rəisi olub. 2007-ci ilin iyununda vəzifədən azad edildikdən 2 ay sonra Azərbaycanın Tacikistandakı səfiri təyin olunub.

2011-ci ilədək səfir fəaliyyətini davam etdirən M. Əliyev, 2012-2017-ci illərdə Prezidentin Müdafiə məsələləri üzrə köməkçisi xidmətinin Müdafiə məsələləri şöbəsinin müdiri, 2017-2019-cu illərdə ədliyyə nazirinin müavini vəzifələrini icra edib. 2019-cu ilin noyabrından etibarən isə, Prezident Administrasiyasının Hərbi məsələlər şöbəsinin müdiridir.