Rumıniyada Dunay çayında suyun səviyyəsi 1996-cı ildən bəri ən aşağı həddə düşüb. Uzunmüddətli quraqlıq səbəbindən fermerlər üçün suvarma məhdudiyyətləri tətbiq edilib.
Manset.az xarici mediaya istinadən xəbər verir ki, Avropada təsirli olan güclü isti hava dalğaları sağlamlıq problemlərinə səbəb olarkən su ehtiyatları da davam edən quraqlığın təsirinə məruz qalıb. Rumıniyanın Su Təsərrüfatı İdarəsi bildirib ki, Avropanın ikinci ən uzun çayı olan Dunayın ölkəyə giriş hissəsində suyun həcmi saniyədə 1700 kubmetr təşkil edib. Bu göstəricinin iyul ayının orta göstəricisi olan saniyədə 4700 kubmetrdən xeyli aşağı olduğu qeyd olunub.
Qurum bəzi bölgələrdə yağan güclü yağışlar nəticəsində Dunayda su səviyyəsinin bazar ertəsindən etibarən tədricən yüksələcəyinin gözlənildiyini açıqlayıb. Aşağı su səviyyəsi səbəbindən fermerlər üçün suvarma məhdudiyyətləri tətbiq olunub, çay boyunca gəmiçilik və turizm fəaliyyətlərində də çətinliklər yaranıb. Bəzi bərə reyslərinin dayandırıldığı, taxıl daşıyan barjların isə hərəkətsiz qaldığı bildirilib.
