Rusiya-Ukrayna müharibəsində Şimali Koreyanın rolunun daha da böyüyə biləcəyinə dair diqqətçəkən iddia gündəmə gəlib. Ukrayna Prezidenti Volodimir Zelenski Şimali Koreyanın Rusiya ərazisinə on minlərlə yeni hərbçi göndərməyə hazırlaşdığını açıqlayıb.
Manset.az-ın xarici mediaya istinadən məlumatına görə, Zelenski bildirib ki, 30 mindən 50 minədək Şimali Koreya hərbçisinin Rusiyada yerləşdirilməsi ilə bağlı qərar qəbul edilib.
Reuters-in yaydığı məlumata görə, Zelenskinin açıqladığı 50 min rəqəmi daha əvvəl gündəmə gələn 30 minlik ehtimaldan da yüksəkdir.
Zelenski Şimali Koreyanın Rusiyaya dəstəyinin yalnız hərbçilərlə məhdudlaşmadığını da bildirib.
Ukrayna ərazisində Şimali Koreya istehsalı raketlərin aşkarlandığını deyən Zelenski, Pxenyan rəhbərliyinin Rusiyaya göstərdiyi hərbi dəstək qarşılığında müasir müharibə təcrübəsi və texnologiya əldə etdiyini iddia edib.
Ukrayna liderinin sözlərinə görə, Şimali Koreya Rusiyanın Ukraynaya qarşı müharibəsində əldə etdiyi bu təcrübədən gələcəkdə Asiya-Sakit okean regionunda baş verə biləcək münaqişələrdə istifadə edə bilər.
Ukrayna hərbi kəşfiyyatının son qiymətləndirmələrində Şimali Koreyaya məxsus raket bölməsinin Rusiyanın qərbində yerləşdirildiyi də iddia edilib.
Sözügedən bölmənin 120-yə qədər ballistik raketə və 6 buraxılış qurğusuna malik ola biləcəyi bildirilir.
Bu vəziyyət xüsusilə Ukrayna üçün əhəmiyyət daşıyır. Kiyev rəhbərliyi Rusiyanın artan ballistik raket hücumları qarşısında hava hücumundan müdafiə sistemlərinin kifayət etmədiyini bildirir.
Şimali Koreyanın müharibədə iştirakının getdikcə artdığını bildirən Zelenski Cənubi Koreya rəhbərliyinə də dəstək çağırışı edib.
Seuldan xüsusilə hava hücumundan müdafiə sistemləri sahəsində yardım istəyən Zelenski, Ukrayna ilə Cənubi Koreya arasında pilotsuz uçuş aparatları və digər müdafiə texnologiyaları sahəsində daha sıx əməkdaşlığın mümkün olduğunu söyləyib.
Zelenskinin son iddiası təsdiqlənərsə, 30-50 min nəfərlik yeni Şimali Koreya qüvvəsi Pxenyanın Rusiya-Ukrayna müharibəsinə indiyədək verdiyi ən böyük hərbi töhfələrdən biri olacaq.
