Bu ilin iyul, avqust və sentyabr aylarında Cənubi Afrika Respublikasında 7000-dən çox insanın qətlə yetirildiyi bildirilir.
Manset.az xarici mediaya istinadən xəbər verir ki, polis naziri Bheki Cele yüksək cinayət nisbətləri ilə diqqət çəkən Cənubi Afrikada iyul, avqust və sentyabr ayları üçün cinayət statistikası hesabatını açıqlayıb.
Məlumata görə, Cənubi Afrikada 7 min 4 nəfər qətl nəticəsində həyatını itirib. Müvafiq olaraq, üç ay ərzində ölkədə saatda təxminən 3 cinayət törədilib. Ötən ilin müvafiq dövrü ilə müqayisədə qətllərin sayı 13 faiz artıb.
Bundan əlavə, 50 000-dən çox quldurluq, 13 000-dən çox cinsi təcavüz və 4 000-dən çox adam oğurluğu baş verib.
Ölkənin üç ən böyük şəhəri Keyptaun, Yohannesburq və Durban cinayət nisbətinin ən yüksək olduğu şəhərlər sırasında olub.
