Mütəxəssislər bildirirlər ki, imtahandan əvvəl qəbul edilən qidalar diqqət, yaddaş və enerji səviyyəsinə birbaşa təsir göstərir. Buna görə də balanslı qidalanma imtahan performansında mühüm rol oynayır.
Manset.az-ın xarici mediaya istinadən məlumatına görə, araşdırmalar göstərir ki, yavaş həzm olunan karbohidratlar, zülal, omeqa-3 yağ turşuları və kifayət qədər su qəbulu beyin fəaliyyətini dəstəkləyir və uzunmüddətli enerji təmin edir. Mütəxəssislər xüsusilə yulaf, tam taxıl məhsulları, yumurta, qatıq, balıq və qoz-fındıq kimi qidaları tövsiyə edirlər.
Həmçinin bildirilir ki, su içmək diqqəti artırır və hətta yüngül susuzlaşma belə yorğunluq və baş ağrısına səbəb ola bilər. Araşdırmalar su qəbul edən tələbələrin imtahan nəticələrində daha yaxşı göstəricilər əldə etdiyini göstərib.
Mütəxəssislər qeyd edirlər ki, omeqa-3 yağ turşuları, dəmir və C vitamini ilə zəngin qidalar konsentrasiyanı gücləndirir və beyin fəaliyyətini dəstəkləyir.
Eyni zamanda, imtahan öncəsi şəkərli, qazlı və enerji içkilərindən, eləcə də həddindən artıq kofeindən uzaq durmaq tövsiyə olunur. Bu məhsullar enerji dalğalanmaları və diqqət zəifliyi yarada bilər.
