Alimlər pişiklərdə narıncı kürk rənginə səbəb olan genetik sirrin 60 ildən sonra DNT-dəki çatışmayan bir hissə ilə bağlı olduğunu aşkar ediblər.
Manset.az xarici mediaya istinadən xəbər verir ki, Stanford Universiteti və Kyusyu Universitetindən olan iki müstəqil tədqiqat qrupu narıncı kürk rənginin Arhgap36 adlı genin tənzimləyici bölgəsində DNT-nin 5 kilobazlıq hissəsinin silinməsi nəticəsində yarandığını müəyyən ediblər. Bu genetik dəyişiklik dəri hüceyrələrində həmin genin normaldan 13 dəfə çox RNT istehsal etməsinə səbəb olur. Nəticədə tünd piqmentlər sarı və qırmızı çalarlara çevrilir.
Tədqiqatçılar araşdırılan bütün narıncı rəngli pişiklərdə bu mutasiyanın X xromosomunda yerləşdiyini təsdiqləyiblər. Bu kəşf narıncı rəngin dişi və erkək pişiklərdə niyə fərqli göründüyünü də aydınlaşdırır.
Yalnız bir X xromosomuna malik olan erkək pişiklər tamamilə narıncı rəngdə ola bilirlər. İki X xromosomuna malik dişi pişiklərdə isə hüceyrələrdən birindəki X xromosomunun təsadüfi şəkildə fəaliyyətsizləşməsi nəticəsində zolaqlı, üçrəngli və ya tısbağa çanağını xatırladan rəng naxışları meydana çıxır.
