Türkiyənin tanınmış klubu "Fənərbaxça" portuqaliyalı baş məşqçi Joze Mourinyo ilə yollarını ayırdığını rəsmən açıqlayıb.
Manset.az türk mediasına istinadən xəbər verir ki, bu qərarın ardından komandanın yeni baş məşqçisi postuna namizədlərin kimliyi də gündəmə gəlib.
İsmail Kartal
Mövsüm başa çatdıqdan sonra İranın "Persepolis" klubundan ayrılan İsmail Kartal "Fənərbaxça"da Mourinyodan öncə baş məşqçi kimi çalışıb. O, komanda ilə 99 xal toplayaraq uğurlu nəticələr əldə edib. Hazırda işsiz olan Kartal klub rəhbərliyinin əsas namizədlərindən biri hesab olunur.
Volkan Dəmirəl
"Fənərbaxça"nın əfsanəvi qapıçısı Volkan Dəmirəl baş məşqçi kimi "Karagümrük" və "Hatayspor"da göstərdiyi performansla diqqət çəkib. Son olaraq Bodrum FK-da çalışan Dəmirəl hazırda azad məşqçidir və onun adı da klubla hallanır.
Aykut Kocaman
Uzun illər "Fənərbaxça"da həm futbolçu, həm də baş məşqçi kimi çıxış edən Aykut Kocaman azarkeşlər arasında hələ də populyarlığını qoruyur. Klubla yollarını bir müddət əvvəl ayırmasına baxmayaraq, onun yenidən komandaya qayıtması üçün ictimai təzyiqlər artır.
Abdullah Avcı
Təcrübəli mütəxəssis Abdullah Avcı da "Fənərbaxça" rəhbərliyi ilə görüşən məşqçilər arasında olub. Lakin sosial mediada azarkeşlərin narazılığı səbəbilə onunla danışıqların dayandırıldığı bildirilir.
Qeyd edək ki, "Fənərbaxça" yaxın günlərdə yeni baş məşqçisinin adını rəsmi olaraq açıqlayacaq.
