Kilian Mbappe ilə PSJ arasındakı hüquqi mübahisədə yeni qərar qəbul edilib.
Manset.az Qol.az-a istinadən xəbər verir ki, Paris Apellyasiya Məhkəməsi “Real”ın hücumçusunu sabiq klubuna 60 min avro təzminat ödəməyə məhkum edib. Qərar 2025-ci ilin aprelində Mbappenin vəkillərinin PSJ-nin bank hesablarına qoyduğu müvəqqəti həbs tədbirinin klub üçün yaratdığı maliyyə itkiləri ilə bağlıdır. Hesabların 45 gün dondurulması PSJ-ni təcili kredit xətti açmağa məcbur edib.
Məhkəmə klubun kredit xətti ilə bağlı xərclərini nəzərə alsa da, mənəvi, imic və reputasiya zərərinə görə kompensasiya tələbini rədd edib.
Xatırladaq ki, Mbappe 2024-cü ilin avqustunda PSJ-dən 60 milyon avro ödənilməmiş bonus və mükafat tələb edib. 2025-ci ilin dekabrında Paris Əmək Məhkəməsi klubun futbolçuya 61 milyon avro ödəməsinə qərar verib və PSJ bu məbləği ödəyib.
