Azərbaycanda uşaq və gənclərin fiziki və mənəvi inkişafını dəstəkləmək məqsədi ilə müxtəlif istiqamətlərdə tədbirlər həyata keçirilir. Ölkə üzrə idman meydançalarının yenilənməsi, sağlam həyat tərzinin təşviqi, həmçinin psixoloji və yaradıcı inkişafı gücləndirən proqramlar genişləndirilir. Bu fəaliyyətlər gənc nəslin həm fiziki, həm də mənəvi baxımdan sağlam formalaşmasına şərait yaratmağı hədəfləyir.
Bəs bu sahədə başqa hansı yeniliklərə ehtiyac var?
Mövzu ilə bağlı Milli Məclisin deputatı Fazil Mustafa Manset.az-a açıqlamasında bu istiqamətdə Azərbaycanda aparılan islahatlardan söz açıb:
“Dövlət tərəfindən bir sıra qanunlar təsdiqlənib. Gənclər, idman və bədən tərbiyəsinin inkişafı, futbolun inkişafı ilə bağlı dövlət proqramları mövcuddur. Bunların tədbiqinin əsasən orta məktəbdən başlaması nəzərdə tutulur. Amma orta məktəblərdə müəyyən infrastruktur yetərsizliyi bir çox uşaqların qabiliyyətlərinin inkişaf etdirilməsinə imkan tanımır. Məsələn, məktəblərdə üzgüçülük hovuzlarının olmaması bir çox potensiallı uşaqların üzgüçülüklə məşğul olmasına imkan yaratmır, bu da onurğa xəstəliklərinin inkişafına gətirib çıxarır. İdman zallarının olmaması, fiziki tərbiyənin prioritet məsələ kimi tutulmaması məktəblərdə bu vərdişlərin mənimsənilməsinə bir çox hallarda əngəl yaradır. Amma bu barədə kütləvi inkişafı ilə bağlı müəyyən addımların atılması vacibdir. Qanunvericilikdə bu barədə problem yoxdur, hər cür istiqamətdə fəaliyyətə imkan yaradılıb. Amma praktikada məsələ bir qədər arzulanan səviyyədə deyil. Orta məktəblərdə müəyyən işlər görülür. Yeni tikilən, xüsusilə də, işğaldan azad olunan Qarabağ ərazisində inşa olunan məktəblərdə idman zallarının standartlara uyğun olmasına müəyyən diqqət yetirilir. Burada futbol, həndbol, voleybol kimi populyar oyunların oynanılmasına şərait yaradılır. Amma bu addımların standartlara uyğun atılması vacibdir”.
Deputat qeyd edib ki, bir çox hallarda məktəblərdə akt zallarının olmaması da uşaqlar teatral vərdişlərinin formalaşmasına imkan yaratmır:
“Bütün bular hərtərəfli düşünülməlidir. Zehni, fiziki hazırlıq, bədən tərbiyəsinin açıq havada keçirilməsi imkanları da uşaqlara tətbiq olunmalıdır. Təbii ki, bu məsələ əsas məsuliyyət həm də valideynlərin üzərinə düşür. Amma valideynlər bir çox hallarda mühafizəkar xarakterə sahib olur. Uşaqlarını hansısa şəkildə idmandan çəkindirməyə meyilli olurlar. Bunun səbəbi bəlkə də uşağın zədə alması və ya təhlükə ilə üzləşməsidir. Bu səbəbdən valideynləri də stimullaşdırıcı addımlar atılmalıdır. Məsələn, məktəblilər üçün üzgüçülük hovuzları, futbol meydançaları ödənişsiz olarsa, valideynlər də uşaqlarını ora gətirməyə maraqlı olar. Çünki hamı istəyər ki, uşaqları fiziki olaraq yaxşı formalaşsın. Buna görə də infrastruktur məsələsi çox önəmlidir. Bu zaman artıq valideynin də məsuliyyətindən danışmaq olar ki, imkanlar olduğu halda valideynlər bunlardan istifadə etmirlər. Amma bunlar olmadıqda tələb etmək də çətindir. Çünki bəzən sadəcə əngəl maddi çətinlik olur. Elə valideynlər də var ki, dünyagörüşü zəifdir. Sadəcə düşünür ki, övladı ali məktəbə qəbul olsa, kifayətdir. Amma yaxşı vətəndaş yetişdirmək üçün sadəcə ali məktəb hədəf ola bilməz. Hədəf ilk növbədə insanın həm zehni, həm də fiziki sağlamlığıdır. Buna görə də bu istiqamətdə ümumi maarifçiliyin, təbliğatın aparılması cəmiyyərdə çox önəmli, vacib məsələlərdən biridir”.
Fidan Vəlisoy
6.3.19. uşaq və gənclərin fiziki və mənəvi inkişafı;
Yazı Medianın İnkişafı Agentliyinin maliyyə dəstəyi ilə hazırlanıb
