Yeniyetmə və gənclərimizi zərərli vərdişlərdən qorumaq, narkotik vasitələrin cəmiyyətdə törətdiyi fəsadlarla bağlı onları məlumatlandırmaq məqsədilə polis əməkdaşları tərəfindən yeni dərs ilində də təhsil müəssisələrində maarifləndirmə tədbirləri davam etdirilir.
Manset.az xəbər verir ki, növbəti belə tədbir Azərbaycan Dövlət Pedaqoji Universitetinin Quba Filialında Rayon Polis Şöbəsinin təşkilatçılığı ilə keçirilib. “Narkomaniyasız sağlam həyat” mövzusunda keçirilən görüşdə polis əməkdaşları və veteranlar, tələbələr, eləcə də müəllimlər iştirak ediblər.
RPŞ-nin rəis müavini polis polkovnik-leytenantı Vüsal Rüstəmov çıxışında ölkəmizdə sağlam nəslin formalaşması istiqamətində həyata keçirilən tədbirlərdən, narkomaniya ilə mübarizə sahəsində görülən işlərdən söz açıb. Vurğulanıb ki, cəmiyyətin hər bir üzvü bu məsələdə öz məsuliyyətini dərk etməli və “ağ ölüm”ə qarşı fəal mövqe sərgiləməlidir.
Sonra mövzu ətrafında çıxış edənlər öldürücü bəlanın pəncəsindən yaxa qurtarmağın yolları barədə danışıblar. Diskussiya şəklində davam edən tədbirdə şagirdləri maraqlandıran suallar cavablandırılıb və sonda narkomaniyanın fəsadları ilə bağlı sosial videoçarx nümayiş edilib.
