Dekabrın 8-də Bakıda ilk dəfə keçiriləcək FIA Mükafatlandırma mərasimi – FIA Prize-Giving Ceremony üçün 2023-cü ilin birincilik qazanmış pilotlarının paytaxtımıza gəlişi nəzərdə tutulub.
Manset.az xəbər verir ki, artıq qalib pilotlar Maks Ferstappen (Formula 1 qalibi), Johan Kristoffersson (FIA Rallikross çempionu), Paolo İppolito (Mondokart.com FIA Kartıng Dünya çempionu) və digərləri Bakıda mükafatlandırma mərasimində iştiraklarını təsdiq ediblər.
Mükafatlandırma mərasimini Bakıdan canlı yayımla FIA-nın “YouTube” kanalında izləmək mümkün olacaq.
2011-ci ildən keçirilən və idman sahəsində ilin ən möhtəşəm hadisələrindən sayılan FIA Mükafatlandırma mərasimi FIA Baş Assambleyasının yekununda təşkil olunur və tədbirdə avtomobil idmanı üzrə müxtəlif nöminasiyalarda mükafatlar təqdim edilir.
Prize-Giving Ceremony bu vaxtadək Monako, Nyu-Dehli, İstanbul, Paris, Doha, Vyana, Sankt-Peterburq, Cenevrə və Bolonyada keçirilib.
Bakıdakı Prize-Giving Ceremony də yaddaqalan və möhtəşəm məqamlar vəd edir.
