Alimlər zamanı işığın atom nüvəsi ilə qarşılıqlı təsirini izləməklə ölçən və dəqiqliyi ilə atom saatlarını geridə qoya biləcək ilk işlək nüvə saatlarını hazırlayıblar.
Manset.az xarici mediaya istinadən xəbər verir ki, bu mühüm kəşfin qaranlıq maddənin və Kainatın fundamental xüsusiyyətlərinin öyrənilməsinə töhfə verəcəyi gözlənilir.
Elektronların enerji səviyyələri arasındakı keçidləri izləməklə zamanı ölçən atom saatlarından 70 ildən artıqdır istifadə olunur.
Bu saatlar GPS texnologiyası, eləcə də zamanın kosmosun müxtəlif bölgələrində fərqli axdığını nümayiş etdirən təcrübələr kimi mühüm elmi və texnoloji nailiyyətlərə imkan verib.
Yeni hazırlanmış nüvə saatları isə işığın atom nüvəsi ilə necə qarşılıqlı təsir göstərdiyini izləmək prinsipi ilə işləyir.
Atom nüvələri atomların özündən təxminən 100 min dəfə kiçik olduğuna görə xarici elektrik sahələrinin təsirinə daha az məruz qalır.
Bu xüsusiyyət atom saatlarının işinə mənfi təsir göstərə bilən xarici amillərin yaratdığı problemləri aradan qaldırmağa və nüvə saatlarını daha etibarlı etməyə imkan verir.
