"Zəngəzur dəhlizi regional əməkdaşlıq üçün yeni imkanlar açır"

"Azərbaycan Prezidenti cənab İlham Əliyev Səudiyyə Ərəbistanının “Əl-Ərəbiyyə” telekanalına verdiyi müsahibədə Zəngəzur dəhlizi məsələsinə toxunaraq bildirdi ki, bu layihə yalnız Şərq-Qərb deyil, həm də Şimal-Cənub istiqamətində böyük strateji əhəmiyyət kəsb edir. Dövlət başçısı qeyd etdi ki, hazırda mövcud olan Şimal-Cənub dəhlizi Rusiyadan başlayaraq Azərbaycan vasitəsilə İrana və Fars körfəzinə qədər uzanır, lakin İran ərazisində hələ tikilməmiş hissələr var və bu səbəbdən layihənin tam gücü ilə işləməsi müəyyən vaxt tələb edir".

Bu sözləri Manset.az-a Milli Məclisin deputatı Vasif Qafarov deyib. Onun sözlərinə görə, Prezident müsahibəsində vurğuladı ki, belə şəraitdə Zəngəzur dəhlizi əlavə alternativ kimi çıxış edə və Şimalla Cənub arasındakı əlaqələrin daha sürətli qurulmasına imkan yarada bilər:

"Onun sözlərinə görə, bu yol Rusiyadan Azərbaycana, daha sonra Ermənistana, Naxçıvana və oradan İrana uzanaraq Fars körfəzinə çıxış təmin edəcək. Beləliklə, Zəngəzur dəhlizi əslində təkcə Şərq-Qərb deyil, həm də Şimal-Cənub dəhlizinin mühüm hissəsinə çevriləcək.

Dövlət başçımız müsahibəsində xüsusi olaraq qeyd etdi ki, bu layihə heç bir ölkəyə zərər gətirmir, əksinə bütün region üçün “hamının udacağı vəziyyət” formalaşdırır. Azərbaycan beynəlxalq tranzit mərkəzinə çevriləcək, Ermənistan iqtisadi təcriddən çıxacaq, İran əlavə Şimal-Cənub bağlantısı qazanacaq, Rusiya və Avropa isə daha qısa marşrut əldə edəcək. Prezident İlham Əliyev İran hökumətinin də bu layihənin faydasını anladığını diqqətə çatdıraraq, Azərbaycanın regional əməkdaşlığı gücləndirmək üçün hər şeyi edəcəyini vurğuladı.

Bu müsahibə bir daha göstərir ki, Azərbaycan regional nəqliyyat strategiyasını yalnız özünün milli maraqları üzərində deyil, həm də qonşu ölkələrin maraqlarını nəzərə alaraq formalaşdırır. Azərbaycan Prezidenti cənab İlham Əliyev Səudiyyə Ərəbistanının “Əl-Ərəbiyyə” telekanalına açıqlamaları, əslində, balanslı və uzaqgörən siyasətin nümunəsidir. Burada həm iqtisadi fayda, həm də geosiyasi sabitlik ön plandadır".

Deputat qeyd edib ki, nəticə olaraq, Zəngəzur dəhlizi layihəsi Azərbaycanın təşəbbüsü ilə bütün region üçün inkişaf imkanlarını genişləndirən, qarşılıqlı asılılığı gücləndirən və uzunmüddətli sülhə xidmət edən bir layihə kimi çıxış edir.:

"Bu layihə bütün region dövlətləri və bütövlükdə bütün Avropa və Asiya üçün böyük faydalar verəcək".