Microsoft Windows 11 əməliyyat sisteminin istifadə nisbəti ilə bağlı yeni məlumatları paylaşmasa da, araşdırmalar platformanın Windows 10 ilə müqayisədə daha az qəbul edildiyini ortaya çıxarıb.
Bu barədə Manset.az xarici KİV-ə istinadən xəbər verir.
Windows 11 çox ciddi avadanlıq tələbləri ilə 2021-ci ilin oktyabrında buraxıldı. O, yalnız 2018-ci ildən sonra buraxılmış prosessorlardan istifadə edən və TPM təhlükəsizlik çiplərini dəstəkləyən cihazlarda işləyə bilər. Bu tələblər əməliyyat sisteminin inkişafının qarşısını alan maneələrdən biri kimi görünür.
Steam kompüter oyunlarının satınalma platformasının sorğusuna əsasən, hazırda Windows 11 əməliyyat sistemlərinin 37 faizini, Windows 10 isə 60 faizini təşkil edir. Bundan əlavə, Statcounter tədqiqat şirkətinin məlumatına görə, Windows 11-in bazar payı təqribən 25 faiz, Windows 10-un isə 70 faizdən yuxarıdır.
Digər tərəfdən, Microsoft Windows 11-in nə qədər tez-tez istifadə edildiyi barədə rəsmi açıqlama verməyib. Lakin şirkətin 2022-ci ilin aprelində dərc olunmuş məlumatlarına görə, proqram təminatı Windows istifadəsinin demək olar ki, 30 faizini təşkil edir. Windows 10 hələ də təxminən 1 milyard cihazda istifadə olunur.
Windows 10 dəstəyi 14 oktyabr 2025-ci ildə dayandırılacaq, yəni təhlükəsizlik yeniləmələri və düzəlişlər sona çatacaq. Ancaq Windows 11-ə keçid sürəti kifayət qədər yüksək olmasa, Microsoft bu tarixi uzatmaq ehtimalı var.
Jalə
Manşet.az
