Almaniyada qlobal nəşriyyat sənayesinin ən böyük və nüfuzlu tədbirlərindən biri olan 77-ci Frankfurt Kitab Sərgisi öz qapılarını açıb. Bu il tədbirin fəxri qonağı Filippin olub.
Manset.az xəbər verir ki, sərgi çərçivəsində Avropa Naşirlər Federasiyası (FEP) Avropa kitab bazarının təhlilini təqdim edib. Hesabatda maraqlı və ziddiyyətli nəticələr qeyd olunub.
FEP-in məlumatına əsasən, kitab bazarının nominal dövriyyəsi 2007-ci ildəki pik həddə qayıdaraq 25 milyard avroya çatıb. Lakin bu göstərici gerçək vəziyyəti tam əks etdirmir, çünki inflyasiya fonunda real gəlir azalmaqda davam edir. Xüsusilə 2021-ci ildən sonra bu azalma daha da sürətlənib.
Çap kitabları hələ də bazara dominantlıq edir – satışların 80 faizindən çoxunu təşkil edir. Bununla belə, audiokitablar ən sürətlə inkişaf edən seqment olaraq qalır: Son dörd ildə bu sahədə təxminən 70 faiz artım qeydə alınıb.
Müsbət dinamikanın başqa bir nümunəsi isə uşaq ədəbiyyatının sabit bazar payıdır – bu kateqoriya bazarın 14-15 faizini təşkil edir və sabitliyini qoruyur.
Pandemiya dövründə onlayn satışlarda müşahidə edilən artımdan sonra ənənəvi kitab mağazalarına maraq yenidən artır – bu, FEP tərəfindən müsbət tendensiya kimi qiymətləndirilir.
Hesabatda ümumi oxuma meylinin azalması qeyd edilsə də, gənclər (16–29 yaş arası) hələ də ən fəal oxucu qrupu olaraq qalır ki, bu da gələcək üçün nikbin proqnozlar verir. Eyni zamanda qadınlar, ali təhsilli və yüksək gəlirli şəxslər oxuma vərdişlərinə daha çox sadiqdirlər.
FEP-in təqdim etdiyi statistikaya görə, İsveçrə Avropada ən çox kitab oxunan ölkə olaraq ilk sırada yer alıb. Digər tərəfdən, İspaniya kitab bazarında ardıcıl 12 ildir ki, artım müşahidə olunur, Fransa isə ikinci əl kitab satışlarının artması ilə seçilir – burada hər beş kitabdan biri yenidən satılır.
