Böyük Britaniya hökuməti sürücülərə artan yanacaq xərcləri fonunda qənaət etməyə kömək etmək məqsədilə "Google" şirkəti ilə yeni əməkdaşlığa başlayıb.
Manset.az xarici mediaya istinadən xəbər verir ki, hökumətin “Fuel Finder” məlumat bazasından istifadə edən sürücülər ilk dəfə “Google Maps” və “Waze” tətbiqləri vasitəsilə ətraflarındakı yanacaqdoldurma məntəqələrindəki cari yanacaq qiymətlərini görə biləcəklər.
Enerji Təhlükəsizliyi və Xalis Sıfır Emissiyalar Departamenti (DESNZ) bu yeniliyin avtomobil sahibi olan ailələrə ildə orta hesabla 40 funt sterlinq qənaət etməyə imkan verəcəyini təxmin edir.
Enerji İstehlakçıları üzrə nazir Polli Billinqton yaşayış xərcləri böhranı ilə mübarizənin hökumətin əsas vəzifələrindən biri olduğunu bildirib. O, ən ucuz yanacağa çıxışın asanlaşdırılmasının sürücülər üçün mühüm dəyişiklik olacağını qeyd edib.
