Çinin Nankin şəhərində adi metro səfəri gözlənilməz hadisə ilə yadda qalıb.
Manset.az xarici mediaya istinadən xəbər verir ki, hərəkətdə olan qatarın vaqonunda sərnişinlərdən birinin müvazinətini itirməsi nəticəsində əlindəki vedrə yerə düşüb.
Vedrənin aşması ilə içərisində olan onlarla canlı ilanbalığı vaqonun döşəməsinə səpələnib. İlanbalıqları qısa müddətdə döşəmə ilə hərəkət edərək vaqonun keçid hissəsinə yayılmağa başlayıb.
Baş verənləri əvvəlcə təəccüblə izləyən sərnişinlər qısa müddət sonra vəziyyətə müdaxilə etmək qərarına gəliblər. Çaxnaşmaya düşməyən sərnişinlər birlikdə hərəkət edərək vaqonun müxtəlif yerlərinə yayılan ilanbalıqlarını bir-bir toplamağa başlayıblar.
Döşəmə üzərində sürüşərək hərəkət edən ilanbalıqlarını tutmaq çətin olsa da, sərnişinlərin birgə səyi nəticəsində canlılar qısa müddətdə toplanaraq nəzarətə götürülüb.
