Elektrikli avtomobillərin simvolik dizayn xüsusiyyətlərindən birinə çevrilən minimalist, gövdəyə gizlədilmiş qapı dəstəkləri Çində 4 milyondan çox avtomobili əhatə edən genişmiqyaslı geri çağırış kampaniyasının əsas səbəblərindən biri olub.
Manset.az xarici mediaya istinadən xəbər verir ki, geri çağırma qərarı, aralarında Çində istehsal olunan və xaricdən gətirilən 2,98 milyon Tesla avtomobilinin də olduğu milyonlarla nəqliyyat vasitəsinə şamil edilib. Qərarın əsas səbəbi fövqəladə hallar zamanı qapı dəstəklərinin yerini müəyyənləşdirməyin və onları açmağın çətin olmasıdır. Geri çağırışdan XPeng, Xiaomi və Geely kimi Çin avtomobil istehsalçıları da təsirlənib.
BBC-nin məlumatına görə, Tesla tərəfindən geniş yayılmış gövdəyə yığışdırılan qapı dəstəyi avtomobilin kuzovuna inteqrasiya olunmuş şəkildə yerləşir və sürücü avtomobilə yaxınlaşdıqda xaricə doğru çıxır.
Lakin Xiaomi markalı avtomobillərin iştirakı ilə baş verən və elektrik sistemində yaranmış nasazlıq səbəbindən qapıların açıla bilməməsi ehtimal edilən iki ölümcül qəzanın ardından bu dizayn təhlükəsizlik baxımından araşdırılmağa başlanıb.
Tesla açıqlamasında bildirib ki, Model 3, Model Y, Model S və Model X avtomobilləri qapı dəstəklərinin salonun üzlük rənginə yaxın olması səbəbindən “aşkar edilməsinin və istifadəsinin çətin olması” ilə əlaqədar geri çağırılır.
Şirkətin sözlərinə görə, qəza zamanı aşağı gərginlikli elektrik sisteminin sıradan çıxması kimi hallarda bu vəziyyət avtomobildəki şəxslərin və ya xilasetmə əməkdaşlarının qapıları mümkün qədər tez açmasına mane ola bilər.
Tesla təsirə məruz qalan avtomobillərin üzərinə xəbərdarlıq etiketləri yerləşdirəcəyini və toqquşmadan sonra avtomobilin şüşələrini avtomatik endirən proqram yeniləməsi təqdim edəcəyini açıqlayıb.
Geri çağırışdan təsirlənən digər şirkətlərin dünyanın başqa ölkələrində də oxşar tədbir görüb-görməyəcəyi isə hələlik məlum deyil.
