Meksikanın Culian şəhərinə bağlı El Limoncito kəndində Hərbi Dəniz Qüvvələri ilə Sinaloa Karteli üzvləri arasında atışma baş verib.
Manset.az xarici mediaya istinadən xəbər verir ki, Meksika Təhlükəsizlik Naziri Omar Garcia Harfuch ABŞ mərkəzli "X" sosial media platformasında etdiyi açıqlamada Hərbi Dəniz Qüvvələri şəxslərinin Sinaloa əyalətində patrul edərkən təşkilatlı cinayətkar qrup üzvlərinin hücumuna məruz qaldığını söyləyib.
Baş verən toqquşmada bir nəfər həyatını itirib, 9 nəfər isə həbs edilib. Garcia Harfuch əməliyyat nəticəsində yüksək kalibrli silahlar, əl bombaları və 89 partlayıcı qurğunun ələ keçirildiyini bildirib.
Garcia Harfuch müvafiq qurumların əhalini qorumaq məqsədilə bölgədə təhlükəsizlik tədbirlərini davam etdirdiyini və əməliyyatların davam etdiyini, ictimaiyyətin məlumatlandırılacağını əlavə edib.
