Karyerası ərzində “Qalatasaray”, “Fənərbağça” və “Beşiktaş” klublarının formasını geyinmiş 37 yaşlı Caner Erkin futbolçu karyerasını başa vurduğunu elan edib.
Manset.az Türkiyə mediasına istinadən xəbər verir ki, Caner Erkin peşəkar futbol karyerasını bitirdiyini sosial şəbəkə hesabında etdiyi paylaşım vasitəsilə ictimaiyyətə çatdırıb. Karyerası ərzində Türkiyədə “Manisaspor”, “Qalatasaray”, “Fənərbağça”, “Beşiktaş”, “Fatih Karagümrük”, “Başakşəhər”, “Eyüpspor” və son olaraq “Sakaryaspor” klublarında çıxış edən 37 yaşlı müdafiəçi, eyni zamanda Rusiyanın “ÇSKA Moskva” və İtaliyanın “İnter” klublarında da oynayıb.
“Manisaspor”un yetirməsi olan Caner Erkin karyerası boyunca ümumilikdə 10 kubok qazanıb. O, 3 dəfə Türkiyə Superliqası, 3 dəfə Rusiya Kuboku, 2 dəfə Türkiyə Kuboku, 1 dəfə Türkiyə Superkuboku və 1 dəfə I Liqa çempionluğu əldə edib.
Ümumilikdə 628 oyunda meydana çıxan futbolçu 45 qol vurub, 133 məhsuldar ötürmə verib. Türkiyə milli komandasının formasını 63 dəfə geyinən Caner Erkin milli karyerasını 2 qol və 11 assistlə tamamlayıb.
