Yeni kompüter simulyasiyası araşdırması Marsın xarici peyki Deimosun hamar səthinin və cənub qütbündəki nəhəng çökəkliyin tək bir böyük asteroidin toqquşması nəticəsində yarandığını ortaya qoyub.
Manset.az xarici mediaya istinadən xəbər verir ki, Marsın kartofa bənzəyən, kiçik və qeyri-müntəzəm formalı peyki Deimos uzun illərdir hamar səthi və qalın toz təbəqəsi ilə astronomların diqqətini cəlb edib. “Nature Astronomy” jurnalında dərc olunan yeni araşdırmaya görə, peykin indiki görünüşü təxminən 320 metr diametrində olan asteroidin Deimosa 45 dərəcə bucaq altında çırpılması nəticəsində formalaşıb.
Avropa Kosmik Agentliyinin “Hera” kosmik aparatının yaxın keçidi zamanı əldə etdiyi məlumatlarla İsveçrənin Bern Universitetində aparılan yüzlərlə toqquşma simulyasiyasının müqayisəsi Deimosun keçmişi ilə bağlı mühüm məlumatlar ortaya çıxarıb.
