“Şəhid balalar üçün ağlayıram” - Nazpəri Dostəliyeva ( VİDEO ) Manset.az

“Şəhid balalar üçün ağlayıram” - Nazpəri Dostəliyeva ( VİDEO )

20:21 - 14 Aprel 2023

"Şəhid ailələrinin evində olmuşam, onlarla yaxından təmasda olmuşam. Onların acısını özümdən betər yaşamışam. Övladım dünyasını dəyişəndə sosial şəbəkədə yazdığım ilk sözlər: "Heç bir şəhid anasından artıq deyiləm". Onlar vətən, topaq üçün canından, qanından keçdilər. Torpaqları düşmən tapdağından azad etdilər. Bizə, gələcək nəsilə nə boyda xoşbəxtlik bəxş etdilər. Gözü yolda qalan, torpaq üçün həyatını yaşaya-yaşaya həsrət çəkən yaşlı insanlara sevinc bəxş etdilər. Buna görə çox zaman öz övladıma deyil, şəhid balalar üçün ağlayıram".

Manset.az bizim.media-ya istinadən xəbər verir ki, bu sözləri Xalq artisti Nazpəri Dostəliyeva qonaq olduğu "Səhər mərkəzi" verilişində deyib.

Sənətçi bildirib ki, artıq bir neçə ildir ki, həm şəhidlərə həm də oğlu Əlinin vəfatına görə, bayramlar keçirmir:

"Polad Həşimovun anası ilə görüşəndə ona dedim ki, sizin dərdinizi bütün xalq paylaşır. Amma mən öz dərdimi içimdə, tək-tənha, yalnız bağa qaçıb, ağacların altında çəkirəm. Bunların hər ikisi çox çətindir. Amma şəhid anaları bilsinlər ki, biz heç zaman onları tək qoymadıq, onların yanında olduq. Onların dərdi bizim oldu. 44 günlük İkinci Qarabağ müharibəsi zamanı şəhidlərimizi görəndə evimdə bayram etmədim. Onda dünyasını dəyişən oğlum Əli sual verdi ki, ana sən niyə görə, şəkərbura, paxlava bişirmirsən?

Cavab verdim ki, bişirmərəm, bayram etmərəm. O, özü də bunu başa düşürdü, sadəcə əhvalımı qaldırmaq üçün belə sual verirdi. Hər il Novruz şirniyyatlarını evimdə özüm öz əllərimlə hazırlayırdım. O qədər dərindən və içdən yandım ki, hər zaman şəhid ailələrin yanında oldum. Və martın 22-si Novruz bayramında oğlum Əli heç nədən ürəktutmasından dünyasını dəyişdi".

Bir il əvvəl ürəktutmasından dünyasını dəyişən oğlundan söz açan N.Dostəliyeva onun son sözlərini dilə gətirib:

"Əli son nəfəsinin olduğunu bilirdi. Uzanmışdı, mən də onun yanında oturub, başını qucaqlamışdım. Bilirdi ki, dünyasını dəyişir. Deyirdi ki, ana sən güclü qadınsan. Sən səhnəyə çıxmalısan. Sevənlərinin gözünü yolda qoyma. O bilirdi mənim güclü olduğumu, amma mən yox. Sonra isə dedi ki, ana haqqını mənə halal elə. Başa düşmədim o, niyə belə deyir. Ürəyimin döyüntüsünü o an eşidirdim, sanki ürəyim az qala ağzıma gəlirdi. Gəldim bacım Zeynəbə sual verdim ki, Əli niyə belə şeylər danışır?

Onda hamı bizdə idi. Onlar mənsiz həyacan içində Əliyə yaxınlaşdılar. Sonra isə mənə söylədilər ki, sən Əlinin yanına keçmə. Həkim briqadası və kardioloq da gəldi. Onu təcili xəstəxanaya aparacaqdıq. Həkim Əlini müayinə edib "Başınız sağolsun, Nazpəri xanım" söyləyib, çıxıb getdi.

Mən bu sözü heç cürə qəbul etmədim. İçəri girib onun üzünü bağlı görəndə başa düşdüm, ağlamadım. Sonra özüm-özümlə qalanda ürəyimdəki o qubarı çıxartdım. Amma bir şeyi bilirəm ki, dünyasını dəyişənlər cənnətdədir. Allah rəhmət eləsin. Məni ayaqda saxlayan insanların sevgisi oldu".