ABŞ-da aparılan bir tədqiqat 65 yaş və yuxarı şəxslərdə tez-tez baş verən, istəksiz və qısamüddətli gündüz yuxularının demans (ağlın zəifləməsi) və yaddaş problemləri riskinin artması ilə əlaqəli olduğunu üzə çıxarıb.
Manset.az xarici mediaya istinadən xəbər verir ki, günün ikinci yarısında divanda mürgüləmək həyatın kiçik zövqlərindən biri ola bilər. Lakin araşdırmalar göstərir ki, gündüz yuxularının tezliyi koqnitiv (idrak) sağlamlığın pisləşməsindən xəbər verən siqnal ola bilər.
Yeni araşdırmada müəyyən edilib ki, tez-tez gündüz yuxusuna gedən yaşlı insanların nadir hallarda yatan və ya ümumiyyətlə yatmayanlarla müqayisədə sonrakı illərdə demans riski ilə üzləşmə ehtimalı daha yüksəkdir.
"The Journals of Gerontology: Series A" jurnalında dərc olunan tədqiqat gündüz yuxusunun koqnitiv tənəzzülə birbaşa səbəb olduğunu göstərmir. Bununla belə, bu hal demans riski ilə əlaqəli bir faktor kimi gündüz yuxularına daha çox diqqət yetirilməli olduğuna işarə edir.
Con Hopkins Universitetinin psixoloqu və yuxu tədqiqatçısı qeyd edir ki, tez-tez gündüz yatmaq demansa səbəb olan beyin dəyişikliklərinin birbaşa səbəbi olmaqdan daha çox, həmin dəyişikliklərin erkən göstəricisi ola bilər.
