Çin Sədri Si Cinpin Rusiya Prezidenti Vladimir Putin və ABŞ Prezidenti Donald Trampla Çinin Şençjen şəhərində keçirdiyi üçtərəfli zirvə görüşünün müsbət, konstruktiv və səmərəli olduğunu bildirib.
Manset.az xarici mediaya istinadən xəbər verir ki, Çin Sədri Si Cinpin ölkənin cənubundakı Quandun əyalətinin Şençjen şəhərində Putin və Trampla keçirdiyi üçtərəfli görüşün nəticələrini dəyərləndirib.
Çin-Rusiya-ABŞ zirvəsinin müsbət, konstruktiv və səmərəli keçdiyini bildirən Si Cinpin üç ölkənin dünya sülhünün qorunması məsələsində eyni mövqeyi bölüşdüyünü qeyd edib. O, hər üç ölkənin böyük çətinliklər hesabına əldə edilmiş sülhün qədrinin bilinməsinin vacibliyini vurğuladığını bildirib.
Si Cinpinin sözlərinə görə, üç ölkə böyük dövlətlərin bütün ölkələrin qanuni təhlükəsizlik narahatlıqlarına ciddi yanaşmalı olduğu, fikir ayrılıqlarının aradan qaldırılmasında isə dialoq və danışıqların ən doğru yol olduğu barədə ortaq mövqedədir.
“Dialoq dayandırılmadığı və qapılar bağlanmadığı müddətcə sülhə ümid var”, – deyə Çin Sədri vurğulayıb.
Si Cinpin liderlərin çətinliklərin öhdəsindən gəlmək üçün əməkdaşlığın vacib olduğu barədə də razılığa gəldiklərini bildirib.
O qeyd edib ki, üç ölkə zirvə görüşündə əldə olunan razılaşmaları həyata keçirməli, qarşılıqlı əlaqələri gücləndirməli, əməkdaşlıq vasitəsilə sülhə töhfə verməli və daha yaxşı dünyanın qurulması naminə birgə çalışmalıdır.